Монгол Улсын Засгийн газрын 2023 оны 11 дүгээр сарын 29-ний өдрийн 419 дугаар тогтоолын хүрээнд Байгаль орчин, уур амьсгалын өөрчлөлтийн яам, түүний харьяа Ойн газарт процессын дахин инженерчлэл хийх шийдвэр гарсан. Тус ажлын хүрээнд ЗГХХГ-ын Тандалт судалгаа, бодлого төлөвлөлтийн газрын дарга Н.Баярмаагаар ахлуулсан Процессын дахин инженерчлэлийн төслийн удирдлагын баг ажиллаж байна.

Хяналт, үнэлгээний Үндэсний хорооны Нарийн бичгийн дарга бөгөөд Ажлын албаны дарга Н.Лхагвадорж төрийн байгууллагуудын үйл ажиллагааг сайжруулахад ПДИ хийхийн ач холбогдол болон үүнд Засгийн газрын Хяналт хэрэгжүүлэх газар нэн чухал үүрэг, оролцоотой байгууллага гэдгийг онцоллоо.

Процессын дахин инженерчлэл хийх нь төрийн бүтээмжийг нэмэгдүүлэх, үр ашигтай засаглалыг бэхжүүлж, иргэн төвтэй төрийн үйлчилгээг хүртээмжтэй, шуурхай, чанартай байх зорилтыг эрхэмлэх нь бидний үйл ажиллагаанд нэн тэргүүнд баримтлах бодлого юм. Иймд БОУАӨЯ түүний харьяа Ойн газарт хийгдсэн ПДИ-ийн тайланг Сайдын дэргэдэх Зөвлөл болон БОУАӨ-ийн сайдад танилцуулж бодлогын томоохон шийдлүүдийг бататган Засгийн газарт танилцуулах бэлтгэлийг хангаж ажиллахыг ажлын хэсэгт Засгийн газрын Хяналт хэрэгжүүлэх газрын дарга Ч.Өнөрбаяр үүрэг болголоо.