Монгол улсын Засгийн газрын 127 дугаар тогтоолын хэрэгжилтийг хангах, “Чөлөөлье” санаачилгын бодит биелэлт худалдаа үйлчилгээний салбарт ямар түвшинд хэрэгжиж байгаа талаар Засгийн газрын хяналт хэрэгжүүлэх газарт Авто худалдааны цогцолборт үйл ажиллагаа явуулдаг Олон улсын худалдаа, логистикийн төвийн бизнес эрхлэгчдийн холбоо хүсэлт гаргасны дагуу тус уулзалт (2026.05.07) боллоо.

Авто 22 худалдааны төв буюу “Олон улсын худалдаа, логистикийн төв”-т өнөөдрийн байдлаар 110 гаруй аж ахуйн нэгж, 700 гаруй иргэд тээврийн хэрэгсэл болон түүний дагалдах сэлбэг хэрэгсэл худалдан борлуулдаг байна. Энэ төрлийн бизнес ихэвчлэн амралтын өдрүүдээр хийгддэг. Гэвч төр төлөөлсөн байгууллага болох “Авто тээврийн үндэсний төв” ням гарагт амардаг, цагийн зохицуулалт өнөөдрийг хүртэл хийгдээгүйн улмаас тээврийн хэрэгслийн нэр шилжүүлэх явцад бодитой хүндрэлүүд учирч байгааг шийдвэрлүүлэхээр хүсэлт гаргаж, гарын үсэг цуглуулжээ.

Засгийн газрын хяналт хэрэгжүүлэх газрын дарга бөгөөд Ерөнхий хянан шалгагч П.Батбаатар “Бизнесийн орчныг дэмжих зарим арга хэмжээний тухай” Монгол улсын Засгийн газрын 127 дугаар тогтоолын хэрэгжилтийг хангах ажлын хүрээнд хувиараа бизнес эрхэлж байгаа эдгээр иргэдийн хүсэлтийг шуурхай шийдвэрлэх боломжтой” гэдгийг илэрхийллээ. Цаашид энэ төрлийн төрийн үйлчилгээг цахим хэлбэрт буюу киоск машинаар хийж гүйцэтгүүлдэг болох, иргэд 7 хоногийн турш 24 цагаар үйлчилгээ авах боломж нөхцлийг бүрдүүлэх чиглэлээр зорилго тавин ажиллаж байгааг энэ үеэр онцолсон юм.